Share Button

Ibikorwa by’urugomo n’ubwicanyi byakorewe Abatutsi mu 1973 mumakomine ya Buringa,Nyabikenke,Mushubati na Musambira mu itegurwa ryaJenoside muri Perefegitura ya Gitarama

Nk’uko bisobanurwa n’ubushakashatsi Komisiyo y’Igihugu yo Kurwanya Jenoside (CNLG) yakoze ku mateka ya Jenoside yakorewe Abatutsi muyahoze ari Perefegitura ya Gitarama ubwicanyi n’ibikorwa by’urugomo byibasiye Abatutsi mu 1973 byakozwe guhera mu mpera za Gashyantare 1973. Umugambi w’abateguye ibyo bikorwa bibi kwari ukwibasira Abatutsi bose bahereye ku bari mu mashuri no mu kazi. Abayobozi bakuru ba PARMEHUTU harimo na Perezida Kayibanda Grégoire nibo bashishikarije abayoboke babo gutangira ibikorwa byo gutwikira Abatutsi, gusenya inzu zabo no kubica.

Ubwicanyi n’ibikorwa by’urugomo byibasiye Abatutsi mu 1973 byakozwe guhera mu mpera za Gashyantare 1973. Umugambi w’abateguye ibyo bikorwa bibi kwari ukwibasira Abatutsi bose bahereye ku bari mu mashuri no mu kazi. Abayobozi bakuru ba PARMEHUTU harimo na Perezida Kayibanda Grégoire nibo bashishikarije abayoboke babo gutangira ibikorwa byo gutwikira Abatutsi, gusenya inzu zabo no kubica

Muri Komini Buringa, Abatutsi bishwe icyo gihe ni: Karuyonga Léonidas wavaga inda imwe na Kagabo, Nkurikiyinka, Karerangabo, Nyamugari. Hishwe na none umugabo witwa Kakuze ari kumwe n’umukecuru we, Gataramirwa wo muri Rugwiza, Odette n’umuryango we. Mu babishe abari ku isonga harimo Murera Théogène mwene Nyirimpeta na Mukabushi, Makore n’abandi. Usibye kwica, habayeho ibikorwa byo gusahura no kurya inka z’Abatutsi.

Muri Komini Nyabikenke, ubwicanyi n’ibikorwa by’urugomo byakorewe Abatutsi byabaye muri Werurwe 1973. Ahitwa Kiyumba hishwe Abatutsi barimo Bidaharinka, Nyiramakomari, Bitukwa, Kayishunge, Gashugeri, Kabundi, Mukarugambwa n’abandi. Babamanuye kuri Nyabarongo aba ariho babicira. Mu bagize uruhare mu iyicwa ryabo hari Depite Muvunankiko Gérard, Niyonzima Maximilien n’abandi.

Muri Komini Mushubati, Abatutsi barishwe, batwika inzu zabo. Mu ibaruwa yo kuwa 24/4/1973 ya Burugumesitiri wa Komini Mushubati, Rwanyabugigira Melchior yamenyesheje Perefe wa Perefegitura ya Gitarama, Karuta Tharcisse, uko umutekano wifashe. Muri iyo baruwa, avuga ko amazu yahiye ari 208, Abatutsi bishwe bagera kuri 29, impunzi zigera ku 1075.

Muri Komini Musambira, mbere yo gutwika inzu z’Abatutsi babanzaga gusohora ibintu byabo, gukuraho imiryango bakabona gutwika. Inzu z’amabati n’amategura babanzaga kuzikuraho ayo mabati. Ababikoraga abenshi babaga ari abarwanashyaka ba PARMEHUTU. Mu bishwe harimo Gatsimbanyi, Rukatibumba, Bisingira n’abandi. Batwitse amazu y’Abatutsi batwara n’inka zabo. Abari ku isonga muri ubwo bwicanyi n’ibikorwa by’urugomo hari Rucyaba Thaddée w’i Musumba, Nkeramihigo nibo bafatanyije n’abanyeshuri bari baturutse ku ishuri ry’i Shyogwe. Abanyeshuri bari bambaye imyambaro y’ishuri (uniforme) bagendaga barangajwe imbere n’abo bagabo babiri bavuzwe haruguru.

Abatutsi bamwe bahungiye kuri paruwasi ya Kamonyi abandi i Musambira. Bahamaze ibyumweru bigera kuri bibiri. Niyonzima Maximilien wari umudepite niwe waje aza kubwira Abatutsi gusubira ku matongo yabo, dore ko bari bamaze kubatwikira. Nyuma yo kubyanga, Burugumesitiri wa Komini Musambira witwa Simbizi niwe wasanze Abatutsi aho bari bahungiye ababwira ko ihumure ryabonetse, ko bashobora gutaha.

 

 

 

Back